ბიძინა ივანიშვილი: “მე არ ვეთანხმები, რომ ღარიბაშვილის ნათესავები მართავენ მთელ საქართველოს”

0

2013092601432501“ღარიბაშვილისთვის რამდენჯერმე მაქვს ნათქვამი, შენი პრობლემა იქნება შენი ნათესავები და დაცვათქო”, – ყოფილმა პრემიერმა ბიძინა ივანიშვილმა ტელეკომპანია “იმედთან” ინტერვიუში მოქმედ პრემიერზეც ისაუბრა.

ივანიშვილის განცხადებით დაცვა “ძალიან აქტიურობს” და “ბიჭებს ყოველდღე” ეუბნება, რომ “უფრო დინჯად” უნდა მოიქცნენ. “პრემიერზე ვიტყვი განსაკუთრებით, რომელსაც მე დავუტოვე ჩემი თანამდებობა. მისთვის რამდენჯერმე მაქვს ნათქვამი – შენი პრობლემა იქნება შენი ნათესავები და დაცვა და საზოგადოება არ გააღიზიანო არც ერთით და არც მეორითთქო. დაცვა ძალიან აქტურობს და პრინციპში, დღესაც პრობლემა მაქვს, ბიჭებს ყოველ დღე ვახსენებ, რომ უფრო დინჯად მოიქცნენ”, – აღნიშნა ივანიშვილმა.

ყოფილი პრემიერის თქმით, ირაკლი ღარიბაშვილისთვის ერთ-ერთი გამოწვევა იყო ნათესავებიც. “ამ მხრივ მას ჰქონდა გამოწვევები და კარგად იცით, როცა ღარიბაშვილი შს მინისტრი იყო, ჯანყარაშვილი დაიხმარა და მას პოსტიც ეკავა. ვფიქრობ, დროზე ვერ გაკეთდა რეაქცია ამასთან დაკავშირებით, მაგრამ არაფერი საშინელება არ მომხდარა. თვითონ ღარიბაშვილმა გააცნობიერა, ნახა, რომ ასე არ შეიძლება და არ ვარგა, მოუსმინა საზოგადოებას და მან გააკეთა დასკვნები”, – აღნიშნა ყოფილმა პრემიერმა.

როგორც ივანიშვილმა აღნიშნა, არ ეთანხმება შეფასებას, რომ საქართველოს ღარიბაშვილის ნათესავები მართავენ. “მე არ ვეთანხმები, რომ ღარიბაშვილის ნათესავები მართავენ მთელ საქართველოს. “ნაციონალური მოძრაობის” კრიტიკა და ოპონირება, უკაცრავად ვარ, მაგრამ ანაგვიანებს პოლიტიკურ ველს. საზოგადოებას ძალიან აფერხებს და ხელს უშლის სწორი ანალიზის გაკეთებაში, მათ შორის მეც, იმდენს საუბრობენ, საზოგადოებას უჭირს ამოარჩიოს, რა ხდება”, – აღნიშნა მან.
რაც შეეხება შეკითხვას, შეეცვალა თუ არა მთავრობაზე წარმოდგენა ერთი წლის განმავლობაში, ივანიშვილის თქმით, ახლაც იგივეს ფიქრობს. “სრულებითაც არ შემცვლია. სწორედ რომ ევროპული ტიპის მთავრობა დავტოვე და დღესაც იგივე აზრზე ვარ”, – დასძინა მან.

სხვა ახალი ამბები: