ლანა ღოღობერიძე: “ის, რაც ოქტომბერში მოხდა, უფრო გადატრიალება იყო”

0

6a202fd047052122ac4147ef32bfac1eრეჟისორი და საქართველოს ყოფილი ელჩი ევროსაბჭოში, ქალბატონი ლანა ღოღობერიძე ამჯერად საქართველოში იმყოფება და ქვეყანაში მიმდინარე ცვლილებებზე საუბრობს:

– ის, რაც ოქტომბერში მოხდა, უფრო გადატრიალება იყო, რადგან ქვეყნის სათავეში მოვიდა ძველ ხელისუფლებასთან ძალიან დაპირისპირებული სრულიად ახალი ძალა. ბიძინა ივანიშვილი ისეთი ადამიანი ჩანს, რომელსაც ადამიანი აინტერესებს. გულწრფელობაც ძალიან მნიშვნელოვანია, რაც ახალ ხელისუფლებას ახასიათებს. ბიძინა ივანიშვილი რასაც ამბობს გჯერა, თუმცა ზოგჯერ არ ვეთანხმები, ზოგჯერ მიკვირს კიდეც მისი გამონათქვამები, მაგრამ ეს ყველაფერი გამოწვეულია იმით, რომ ბარიერი არ აქვს.შეიძლება დროთა განმავლობაში ჩამოყალიბდეს და აღარ თქვას ქართველებს ხშირად საყვარლები ჰყავთო. შეიძლება სიმართლეს ამბობდეს, მაგრამ არსებობს თემები, რომლებსაც პოლიტიკოსი არ უნდა შეეხოს, რადგან მხოლოდ ჩრდილს აყენებს მას.

– ყბადაღებულ კოჰაბიტაციაზე რას გვეტყვით?

– კოაბიტაცია ფრანგული სიტყვაა და თუ მაინცდამაინც გვსურს ამ სიტყვის გამოყენება სწორად უნდა ვთქვათ… საფრანგეთი ამ მხრივ კლასიკური ქვეყანაა. იქ ყველაფერი ცივილიზებულად და იუმორით ხდება. ის ძალა, რომელიც ოპოზიციაში გამოდის სერიოზულად და არგუმენტირებულად ებრძვის ქვეყნის სათავეში მოსულ ხელისუფლებას. ამით არწმუნებს ხალხს, რომ არჩევნებში გამარჯვების შემდეგ უფრო მეტ სარგებელს მოუტანს ქვეყანას… ჩვენთან წინა ხელისუფლების წარმომადგენლები ისე საუბრობენ და იქცევიან, თითქოს ხუთი წუთის წინ არ იყო ციხის კადრები რომ ვნახეთ, ადამიანები ღამით რომ მიჰყავდათ პოლიციაში და აწერინებდნენ განცხადებას თითქოს მათ სურდათ თავიანთი ქონების გაჩუქება. ახლახან ერთი პარლამენტარი ეუბნებოდა მეორეს თქვენ სულ წარსულზე საუბრობთო. თითქოს ეს წარსული მე-12 საუკუნე იყო ან თუნდაც საბჭოთა წარსული. ოთხი-ხუთი თვის წინ ხდებოდა ის, რის გამოც გადაირჩია ხალხმა ხელისუფლება.. ამის ატანა ზოგჯერ აუტანელი ხდება და ვნახეთ კიდეც პირდაპირ ეთერში რაც მოხდა. ცემა-ტყეპაზე გაცილებით უარყოფითად ჩემზე შუა ეთერში უშვერმა გინებამ იმოქმედა. ეს უდიერი სტილია.. პარადოქსული ერი ვართ.

– მახსოვს, თქვენ ედუარდ შევარდნაძეს “თეთრი მელა” უწოდეთ… ეს ყველამ აიტაცა…

– ედუარდ შევარდნაძემ ბევრი რამ გააკეთა კარგი და საინტერესო, მაგრამ ბოლო წლებში მისი ქმედება ჩამთვის მიუღებელი იყო. იმდენად დავუპირისპირდი, რომმთავრობის სხდომაზე ჩემზე ოფიციალურად განაცხდა მოღალატე ელჩიაო. დღესაც მიმაჩნია რომ ბევრი პროგრესული რამ გააკეთა საქართველოსთვის (რასაც ახლა არავინ არ აღიარებს), შემდეგ კი კლანების გავლენის ქვეშ მოექცა. კონკრეტულად ზურაბ ჟვანიას და ახალგაზრდა თაობას დაუპირისპირდა.

– თუ არ ვცდები, ზურაბ ჟვანიასთან მეგობრობა გაკავშირებდათ?

– დიახ.. ზურაბ ჟვანია ჩემი ასაკში შეძენილი ერთადერთი მეგობარი იყო. ნამდვილი მეგობარი იყო იმ ზომამდე რომ, როცა ზურა სტრასბურგში ჩამოდიოდა, სასტუმროს ნაცვლად ჩვენს სახლში ცხოვრობდა. გვსურდა სულ გვესაუბრა. არაჩვეულებრივი პიროვნება იყო და მოვლენა ჩვენს სინამდვილეში. მხოლოდ იდეები კი არ ჰქონდა პროგრესული, არამედ ამ იდეების განხორციელება შეეძლო. საქართველოში პარლამენტარიზმი რა თქმა უნდა ზურაბ ჟვანიას ჩამოყალიბებულია. ზურაბ ჟვანიას ჰქონდა ნამდვილ ევროპულ ფასეულობებზე დამყარებული ტენდენციები, თორემ წინა ხელისუფლება სულ ევროპას გაიძახოდა…ზურაბ ჟვანიას კი მართლაც მიჰყავდა საქართველო ევროპისკენ და ევროსაბჭოსგანაც ჩვენს მიმართ არაჩვეულებრივი დამოკიდებულება იყო. როგორც გასაოცარ ქვეყანას ისე გვიყურებდნენ. ჩვენ რომ ევროსაბჭოში მიგვიღეს ეს მათთვისაც ზეიმი იყო. მახსოვს ლენი ფიშერი (იმდროინდელი ევროსაბჭოს თავმჯდომარე) იდგა და სიხარულის ცრემლები მოსდიოდა. დავწერე კიდეც რა კარგი იქნება ევროპელები თუ ჩვენგან ემოციურობას გადაიღებენ და ჩვენ მათი რაციონალიზმი როგორ გვჭირდება-თქო…

– ზურაბ ჟვანიას გარდაცვალების შემდეგ ხომ არ გამძაფრდა თქვენი პროტესტი წინა ხელისუფლების მიმართ?

– რა თქმა უნდა!.. სანამ ზურაბ ჟვანია იყო, მანამ ნათელი იყო ჩვენი ვექტორი ევროპისკენ და დემოკრატიისკენ სვლისკენ. შემდეგ მომხდარმა ძალიან დამაეჭვა. ძალიან ეჭვი მეპარება თითქოს გაზით გაიგუდა, მაგრამ რა მოხდა არ ვიცი. როგორც ვხედავთ გამოძიება ჭიანურდება.

– თქვენი მისამართით იყო გარკვეული კრიტიკული დამოკიდებულება, როდესაც ამ დონის ხელოვანი პოლიტიკაში წახვედით… ნანობთ პოლიტიკაში წასვლას?

– რას ამბობთ, იმდენად საინტერესო დღეები იყო ევროსაბჭოში, როგორ შეიძლება ვნანობდე?!.. ევროსაბჭოში დელეგაციის ხელმძღვანელი გახლდით. ჩვენი დელეგაცია იყო – მიხეილ სააკაშვილი, კახა ჩიტაია, ირინა სარიშვილი, ვანო ხუხუნაიშვილი… მიხეილ სააკაშვილს ბრწყინვალე გამოსვლები ჰქონდა, ჩემ გამოსვლებსაც ყოველთვის კარგად იღებდნენ, კახა ჩიტაია ურთიერთობების დიდოსტატი იყო… ჩვენ როცა პირველად ჩავედით როგორც დელეგაცია, საქართველოზე თითქმის არაფერი იცოდნენ და დელეგაციის შრომის შედეგად საქართველო ის ცნება იყო, რომელიც ძალიან დიდ ინტერესს იწვევდა…როცა ტერი დევისმა მოხსენება გააკეთა საქართველოს შესახებ, ეს მოხსენება ისეთი იყო დღესაც ყველა უნდა კითხულობდეს. ბუშმა რომ თქვა საქართველოზე “დემოკრატიის შუქურა” არისო ასე კი არა, არამედ დასაბუთებული იყო საქართველო რა ქვეყანაა, საიდან მოდის და როგორ ვითარდება.

– ამბობენ, რომ ახალ ხელისუფლებას არ აქვს დასავლეთის მხარდაჭერა…

– დღეს ყველაზე მძიმედ ეს მესახება. ბევრი მიფიქრია და მგონია, რომ მიხეილ სააკაშვილმა და მისმა გუნდმა შეძლეს დაერწმუნებინათ დასავლეთი, რომ მათი სახით ახალგაზრდა გუნდია მოსული, რომლებსაც აქვთ დასავლური განათლება, აბსოლუტურად ესმით დღევანდელობის არსი და დემოკრატიულ ქვეყანას აშენებენ… მე მათ ცალ-ცალკე ყველას კარგად ვიცნობ და მართლაც ასეთები იყვნენ. არ ვიცი შემდეგ რა როლი ითამაშა პიროვნულმა თვისებებმა თუ ძალაუფლებით ტკბობამ. შეიძლება ზედმეტად ახალგაზრდები იყვნენ და საფუძველი ადვილად შეირყა. დემაგოგია გახდა ყველაფერის წარმართველი და ახლა კაცს მათი არცერთი სიტყვის არ გჯერა… დასავლეთს კი მათი ნამდვილად ჯეროდა, თან როცა რომელიმე ქვეყანას ასე გამოყოფ და აღიარებ სხვების ეტალონად, შემდეგ აქედან გადახვევა ცოტა რთულია… დასავლეთს საქართველოში არჩევნების შემდეგ სურდა კოაბიტაცია და არავითარი პოლიტიკური დევნა არ ყოფილიყო. ვერ მიხვდნენ, რომ ეს პოლიტიკური დევნა კი არა სამართლიანობის აღდგენაა. აქ ქართველი ხალხი უკმაყოფილოა იმით რომ ჯერ საქართველოში სამართლიანობის აღდგენა ვერ მოხდა. ახალმა ხელისუფლებამ უფრო მეტად უნდა გააგებინოს დასავლეთს თუ რა ხდება დღეს საქართველოში. სახალხო პარტია ევროპის საბჭოში მაშინაც ყველაზე ძლიერი პარტია იყო და მათთან ჩვენი წინა ხელისუფლების წარმომადგენლებს ახლო კავშირები აქვთ. ახლაც ამ სახალხო პარტიის ლიდერებმა რა განცხადებები გააკეთეს… – ქვეყანა, რომელიც მართლაც წინ და დემოკრატიის გზით მიდიოდა, გაჩერდაო… ჩემი აზრით აბსოლუტურად საპირისპირო შეფასებაა იმის, რაც ქვეყანაში ხდება.

გაზეთი “კვირის პალიტრა”

სხვა ახალი ამბები: